ന‌്യൂഡല്‍ഹി : നിര്‍ബന്ധിത നാര്‍ക്കോ പരിശോധന നിയമവിരുദ്ധമാണെന്ന് സുപ്രീം കോടതി വിധിച്ചു. കര്‍ണാടക സ‌്വദേശി സമര്‍പ്പിച്ച ഹര്‍ജിയിലാണ് നാര്‍ക്കോ അനാലിസിസ്, ബ്രയിന്‍ മാപ്പിങ്ങ്, പോളിഗ്രാഫ് എന്നിവ വ‌്യക്തികളുടെ അനുമതിയില്ലാതെ നടത്തരുതെന്ന് ചീഫ് ജസ്റ്റീസ് കെ.ജി. ബാലകൃഷ്ണന്‍ അദ്ധ‌്യക്ഷനായ ബഞ്ച് വിധിച്ചത്. രാജ‌്യത്ത് കോളിളക്കം സൃഷ്ടിച്ച പല കേസുകളിലെയും അന്വേഷണത്തെ ഈ വിധി ബാധിക്കും. നാര്‍ക്കോ പരിശോധന അടക്കമുള്ളവ വ‌്യക്തികളുടെ സ‌്വാതന്ത്ര‌്യത്തിന്മേലുള്ള കടന്നുകയറ്റമാണെന്ന് സുപ്രീംകോടതി നിരീക്ഷിച്ചു. കുറ്റാന്വേഷണത്തില്‍ മൂന്നാംമുറ പ്രയോഗിക്കാന്‍ കഴിയാത്തതിനാല്‍ നാര്‍ക്കോ അനാലിസിസ് പോലുള്ള ശാസ്ത്രീയ രീതികള്‍ അനുവദിക്കണമെന്ന് സിബിഐയും കേന്ദ്രസര്‍ക്കാരും കോടതിയില്‍ വാദിച്ചിരുന്നു. ഇത്തരത്തിലുള്ള പരിശോധനകള്‍ കുറ്റാന്വേഷണത്തിന് പ്രധാനമായേക്കാമെന്നും എന്നാല്‍ ഈ തെളിവുകള്‍ അംഗീകരിക്കില്ലെന്നും കോടതി വ‌്യക്തമാക്കി.